Нэгдсэн үндэсний байгууллагын “Дэлхийн усны өдөр”-т зориулан Монгол улсын Их, дээд сургуулиудын оюутнуудын дунд уламжлал болон зохион байгуулагддаг “УС ХӨГЖЛИЙН ТҮЛХҮҮР” сэдэвт эрдэм шинжилгээ, онол практикийн XIX бага хурал 2025 оны 3 дугаар сарын 24-ний өдөр АШУҮИС-ийн Нийгмийн эрүүл мэндийн сургууль амжилттай зохион байгууллаа.
Энэ удаагийн хурал нь ЮНЕСКО-ийн Олон улсын ус зүйн хөтөлбөрийн 50 жилийн ой, усны шинжлэх ухааны чиглэлээр үйл ажиллагаа явуулж эхэлсний 60 жилийн ой, АШУҮИС-ийн Нийгмийн эрүүл мэндийн сургуулийн 70 жилийн ойг угтан зохион байгуулж буйгаараа онцлог болов.
Монгол улсын Засгийн газрын гишүүн, Байгаль орчин, уур амьсгалын сайд С.Одонтуяа, АШУҮИС-ийн НЭМС-ийн захирал Д.Даваалхам нар “Ус-хөгжлийн түлхүүр” сэдэвт эрдэм шинжилгээний хурлыг нээж үг хэлж, мэндчилгээ дэвшүүлэв.
Эрдэм шинжилгээний хуралд АШУҮИС, МУИС, ШУТИС, ХААИС, МУБИС, ҮБХИС болон Оточ Манрамба их сургууль зэрэг 10 сургуулийн 41 багийн эрдэм шинжилгээний илтгэлийг хэлэлцүүлж, усны салбарын эрдэмтэн судлаачдын зөвлөлийн 15 гишүүн шүүн хэлэлцсэн ба тэргүүн байруудыг АШУҮИС, МУИС, ШУТИС-ийн оюутнуудын баг эзэллээ.
Хурлын үйл ажиллагааг дэмжиж хамтран ажилласан. ЮНЕСКО-ийн Монголын үндэсний комисс, Монголын улаан загалмайн нийгэмлэг, Дэлхийн Зөн Монгол Олон улсын байгууллага, Газар зохион байгуулалт, геодези, зураг зүйн ерөнхий газар, Туул голын сав газрын захиргаа, Монголын залуучуудын холбоо, Монголын оюутны холбоо, Усны академи ТББ, Монголын нийтийн аж ахуйн үйлчилгээний холбоо, Дэлхийн усны түншлэл, ADAПТ төсөл, Мэйжор Дриллинг Монгол ХХК, “Дунар-Од” ХХК, O-spring, S-tech House, Одь-Тан, Ургана ХХК-ийн хамт олондоо талархал илэрхийлье.
